(১)
নৈৰ পাৰৰ জুইকুৰাত
গাটো জুবুৰিয়াই গুচি যোৱা সূৰ্যটো
বেলিফুল হৈ
দোঁ খাই পৰিছে মাটিলৈ
শুনিবলৈ আইৰ মুখৰ
এষাৰ হেঁপাহৰ মাত
পুত্ৰহাৰা আইৰ উদং কলিজাটো সাৱটি
আই-আকুল
জন্ম জন্মান্তৰৰ
সোণাৰুফুলীয়া সৰগী দুখনি হাত।
(২)
ক’ম ক’ম বুলি
সাঁচি থোৱা বহু কথা
দিম দিম বুলি সযতনে ৰখা
অলেখ উপহাৰ
পৰি আছে
দ’ম হৈ বুকুৱে বুকুৱে
গেজেপনি হৈ
বুকুৰ ৰুমালখনত
‘ৰজনীগন্ধা চেণ্ট’ৰ
টুকি লোৱা টোপালটিত
ঢালি দিয়া
হৃদয়ৰ সুগন্ধি আকুলতাক সাৱটি!
গেজেপনিয়ে গিলি থ’লে
কত হেঁপেহুৱা চঞ্চল নাচোন!
নাচি থাকা অনুসূয়া,
মোৰ ৰুমাল খনৰ
ৰজনীগন্ধাৰ সেই সুবাসটি হৈ।
(৩)
প্ৰেমৰ জুইকুৰাত জহি
ক’লৈ যায় ছগাবোৰ
ছাই হৈ উৰি উৰি!
জীৱনৰ সিপাৰে
আছে নেকি বৃন্দাবন
আছে নেকি
পাৰিজাত ফুলনি!
ক’বানে অনুসূয়া
(৪)
সময়ো বুঢ়া হয়
মানুহৰ দৰে।
অৰুণ কিৰণ সানি
দুপৰীয়া
সেউজীয়া ছটিয়াই
আৱাহনী হাতবাউল দি থকা
অদূৰৰ পাহাৰখন
প্ৰৌঢ় সন্ধ্যাৰ
ছানি বন্ধা ঘোলা পোহৰত
এটি দৈত্যৰ দৰে বহি থাকে
থমথমকৈ।
ফোন: ৯৪৩৫৫৫৩২৯০
