ঐতিহাসিক অসম একাডেমিৰ পৰা প্ৰকাশ কৰা ‘জাংফাই’আলোচনীৰ এইটো দ্বিতীয় সংখ্যা ৷ এই সংখ্যাৰ পৰা পূৰ্বৰ PDF ফৰমেট পৰিহাৰ কৰি সম্পূৰ্ণ website হিচাপে ‘জাংফাই’ক সজোৱা হৈছে ৷ এই সংখ্যাৰ পৰা জাংফাইক এটা স্বতন্ত্ৰ website হিচাপে প্ৰতি দুমাহৰ মূৰে মূৰে নিয়মীয়াকৈ আলোচনী হিচাপে প্ৰকাশ কৰা হ’ব ৷ অসমৰ লগতে সমগ্ৰ পৃথিৱীৰ অসমীয়া পঢ়ুৱৈয়ে জাংফাইক পঢ়িব পাৰিব ৷ অসমৰ এগৰাকী বৰেণ্য সাহিত্যিক, সংগঠক, গৱেষক বিৰিঞ্চি কুমাৰ বৰুৱাই ৬০ দশকত প্ৰতিষ্ঠা কৰা অসম একাডেমিৰ নিজৰ লক্ষ্য উদ্দেশ্য আৰু সংহতিৰ নীতিক এই আলোচনীয়ে বহন কৰিব পাৰিব বুলি আশা কৰা হৈছে ৷ ৬০ দশকৰ দৰে বিক্ষিপ্ত, বিভ্ৰান্ত আৰু ৰাজনৈতিক বিষবাস্পৰে ভৰি পৰা বাতাবৰণ আমাৰ সমাজত এতিয়াও শেষ হৈ যোৱা নাই ৷ এনে বাতাবৰণত অনৈক্য আৰু অস্থিৰতাবোৰ যাতে আৰু বাঢ়ি নায়ায় তাৰবাৰে আমি বিশেষভাবে সচেষ্ট হ’ব লাগিব ৷ সেয়েহে ‘জাংফাই’ত আমি সকলোধৰণৰ ৰাজনৈতিক,
মতাদৰ্শগত সংঘাত আৰু পৰিস্থিতি উদ্ৰেক কৰিব পৰা লেখা পৰিহাৰ কৰি চলিম ৷ ইয়াৰ পৰিবৰ্তে সকলোধৰণৰ সৃষ্টিশীল লেখাক গুৰুত্ব দিয়া হ’ব ৷ অসমীয়া বহুলোক বৰ্তমান দেশ – বিদেশত নিগাজিকৈ থাকিবলৈ লৈছে ৷ সেই সকলৰ লিখনিও আমি জাংফাইত সন্নিবিষ্ট কৰি ‘প্ৰৱাসীৰ শিতান’ এটা সংযোজন কৰিবলৈ আগ্ৰহী ৷ উদ্ভাৱনশীল, কলা-সংস্কৃতি – শিল্প বিজ্ঞান – প্ৰযুক্তি, অনুবাদ আৰু সাহিত্যৰ বিৰ্তকবহিৰ্ভূত লেখাকহে গুৰুত্ব দিয়া হ’ব ৷ এইবোৰৰ উমাল চৰ্চাৰ মাজেৰে ‘জাংফাই’য়ে সংহতি আৰু সম্ভাৱনাৰ লক্ষ্যলৈ আগবাঢ়িব পাৰিব বুলি আশা কৰা হৈছে ৷ সকলো স্তৰৰ লোকৰ পৰা সহযোগিতা কামনা কৰা হ’ল ৷
উৎপল কুমাৰ দাস
ফোনঃ ৯৪৩৫০১২১৯১
