জাংফাইৰ এইটো তৃতীয় সংখ্যা,ইংৰাজীৰ মাৰ্চ মাহ ৷ অসমীয়া ফাগুন মাহ,তাৰমানে সমাগত বসন্ত ৷ আমি দেখোন এই সংখ্যাক ‘বসন্ত সংখ্যা’ বুলিও অভিহিত কৰিব পাৰোঁ ৷ তেনেহ’লে অহা সংখ্যাতো হ’ব ‘গ্ৰীষ্ম সংখ্যা’ ৷ নগৰ-মহানগৰৰ কংক্ৰীটৰ অৰণ্যত মানুহৰ ঋতুৰ কথা মনত নপৰিলেও ঋতুৱে কিন্তু নাপাহৰে সময়ৰ কথা ৷ মানুহৰ বন্ধ নাক, শুকান ডিঙি, এলাৰ্জীয়ে বসন্তৰ সংকেত দি দিয়ে ৷ বজাৰৰ আজিকালিৰ বাৰমহীয়া ফুলকবি, বন্ধাকবিৰ মাজতে জিলমিল, মাটিকাঁদুৰী, খুতুৰা শাকে বাৰমহীয়া পাচলিৰ মাজতে আমাক মনত পেলাবৰ চেষ্টা কৰে ঋতুৰ পৰিৱৰ্তনৰ কথা, বসন্তৰ কথা ৷ আমি মানুহে কৰ্মব্যস্ততাৰ বাবেই হওক বা অন্য কাৰণৰ বাবেই হওক ঋতু পৰিৱৰ্তনৰ ভূ নাপাওঁ বা নলওঁ ৷
সাহিত্যও তাৰ ব্যতিক্ৰম নহয় ৷ লক্ষ্মীনাথ বেজবৰুৱাৰ পাটমুগী গল্পৰ পকা ঔ টেঙাৰ উল্লেখ নিশ্চয় এই বসন্ত কালৰ গল্প ৷ গতিকে ঋতুৰ লগত সংগতি ৰাখি দুই-এটা গল্প বা কবিতা জাংফাইত প্ৰকাশ কৰিব পাৰিলে হয়তো জাংফাইৰ সৌন্দৰ্য বাঢ়িলেহেতেঁন ৷ লেখক-লেখিকা সকললৈ এটি অনুৰোধ ৷
উৎপল কুমাৰ দাস
ফোন: ৯৪৩৫০১২১৯১
