প্ৰশ্নোত্তৰ

আমাৰ অকণমানিটোৱে তাৰ ছবিৰ বহীত টিলা এটা আঁকে
অঁকাৰ শেষত টিলাটোৰ নাম দিয়ে–প্ৰশ্ন
আমাৰ অকণমানিটোৱে তাৰ ছবিৰ বহীত পাহাৰ এটা আঁকে
অঁকাৰ শেষত পাহাৰটোৰ নাম দিয়ে–প্ৰশ্ন
আমাৰ অকণমানিটোৱে তাৰ ছবিৰ বহীত পৰ্বত এটা আঁকে
অঁকাৰ শেষত পৰ্বতটোৰ নাম দিয়ে–প্ৰশ্ন

কণমানিটোৱে তাৰ ছবিৰ বহীত সাগৰ এখন আঁকে
কণমানিটোৱে তাৰ ছবিৰ বহীত পৃথিৱীখন আঁকে
কণমানিটোৱে তাৰ ছবিৰ বহীত জোন-বেলি-তৰা আঁকে
কণমানিটোৱে তাৰ ছবিৰ বহীত সৌৰজগতখন আঁকে
কণমানিটোৱে তাৰ ছবিৰ বহীত হাতিপটি আঁকে

তাৰ পাছত প্ৰশ্ন প্ৰশ্ন প্ৰশ্ন প্ৰশ্ন প্ৰশ্ন আঁকে
দশোদিশে ইমান প্ৰশ্নৰ পাছতো ৰৈ যায় তাৰ আৰু অগণিত প্ৰশ্ন

লাহে লাহে কণমানিটোৱে আঁকিবলৈ তাৰ ছবিৰ বহীত আৰু পাত নাথাকে
প্ৰশ্নবোৰ দিনে দিনে ডাঙৰ হৈ যায়- সৰু হৈ যায় তাৰ বহীৰ পাতবোৰ
নঅঁকা ব্ৰহ্মাণ্ডখনৰ ছবি এইবাৰ সি আঁকিবলৈ আৰম্ভ কৰে বুকুৰ কেনভাছত

ব্ৰহ্মাণ্ড নামৰ কেনভাছখনৰ বাবে
কণমানিৰপৰা গৈ চেমনীয়াটো যেতিয়া নিজেই এটা প্ৰশ্নবোধক
একে সময়তে মোৰ বাবে সি এটা সৰ্বোত্তম উত্তৰ

ফোন নং: ৯৪৩৫০৪৭০৫৩