১
জেওৰা ভাঙি সোমাই আহিল ফাগুন এজাক
তাই তালফাল খাই পৰিল পিৰালিত
কাইলৈ সিও অহাৰ কথা !
তাই তাক ক’ম ক’ম বুলি সাঁচি ৰখা কথা এমুঠি
আজি ৰ’দত দিছে
ৰাতি শুবৰ পৰত মোক কৈছিল
কথা মুঠি হেনো সেমেকা সেমেকা গোন্ধাইছে
কাইলৈ সি অহাৰ কথা !
সিদিনা চলিব ধৰা নাওখনত উঠিব পৰাকৈ
তাইৰ ওচৰত বহুতো কাৰণ আছিল
নৈৰ সিপাৰে ব’হাগ ৰৈ থকাৰ খবৰ পায়ো
ইপাৰৰ ফাগুন এৰি যাব পৰাৰ কাৰণ বহুতো আছিল
নাওখন গুছি গ’ল
তাই ইপাৰতেই ৰ’ল ৷
সি আহিছিল কিছুপৰ পিছত,
লগতে আহিছিল গুলঞ্চৰ সুবাস
তাইৰ পদূলিত গুলঞ্চ নুফুলে,
কি জানো আৱেগৰ খেলিমেলি হ’ল ৷
তাই ৰৈ গ’ল ৷
উকমুকনি এটা মোৰ বুকুত গুজি
তাই সাৰে থাকিল গোটেই নিশা
কাইলৈ সি অহাৰ কথা !
২
নাৰিকল জোপাত বহি
ৰ’দজাকে টোপনিয়াই আছিল…
তাই মুখত হালধি ঘঁহিছে
আজি সি অহাৰ কথা !
জপনাৰ শব্দত
তাই চোতাল পালেহি ৷
তাক দেখি সৰি পৰিল ফাগুন এজাক
তাইৰ বুকুৰ খিৰিকীৰে সৰকি গ’ল এচলু ৰঙা
কৃষ্ণচূড়া…
ৰ’দজাক কোচতে লৈ
গাতে লাগো নলগাকৈ
তাই বহিল তাৰ ওচৰতে…
কওঁ নকওঁকৈ তাই কৈ গ’ল…
– ‘মোৰ প্ৰায়েই তোলৈ মনত পৰে…
তোলৈ চাই থাকোঁতেও তোলৈ মনত পৰে
মোক ‘মোৰ’ দৰে
তোক ‘তোৰ’ দৰে
আমি ইজনে সিজনক নেদেখিলো কাহানিও ৷
যি দেখিলোঁ, সেয়া মাথো ভগ্নাৱশেষ ৷
লগ পোৱা নহ’ল কাহানিও
কথা পতা নহ’ল কাহানিও…’
কি জানো উত্তৰ বিচাৰি তাই তালৈ চালে,
টোপনিৰ ভৰত সি
হাউলি পৰিছিল ৰ’দজাকত
তাৰ চোলাৰ জেপৰ পৰা সৰি পৰিল
এপাহ গুলঞ্চ,তাই পদূলিলৈ চালে
নাই !
এইবেলিও ফুলা নাই গুলঞ্চজোপা…
ডলী নাথ
ফোন: ৭৮৯৬৯৯৯২৭৩
