ষড়যন্ত্ৰ আৰু ষড়যন্ত্ৰৰ সন্দেহ দুটা বেলেগ বস্তু।
মোৰ ইমানবোৰ জিভা নাই
প্ৰতিধ্বনিবোৰৰ কথা ক’বলৈ
সাহিত্যৰ, সম্ভোগৰ, সংস্পৰ্শৰ।
কেতিয়াবা কোনো কাহিনীৰ অন্ত নাথাকে
কোনো ৰাস্তাৰ লক্ষ্য নাথাকে
সেইবোৰক তেনেকৈ এৰি থৈ অহাই ভাল
আটাইতকৈ ভাঁজ লগা পাকটোৰ পৰা
আঁতৰি অহাই ভাল।
যদিওবা মন যায় দৌৰি ফুৰিবলৈ
মেঘৰ দৰে
আকাশৰ ওপৰেদি
দুখবোৰ বৰষুণ হৈয়েই পৰে–
সকলোৰে শেষত যেতিয়া
শূন্যতা
বেলুন নে চিলা
কোন কিমান ওপৰলৈ
আকাশৰ ওচৰলৈ
বেলেগকৈ চোৱাৰ অৱকাশ নাথাকে৷
কথাটো অচল মানুহ এটাক সাগৰ পাৰত
এৰি থৈ অহাৰ নিচিনা
ভৰিত ঢৌৰ স্পৰ্শও অনুভৱ কৰিব নোৱাৰে
ক্ষয় হ’বলৈ কোনেনো বিচাৰে
মাটি হ’বলৈ
স্থায়িত্বৰ ধাৰণাই তথাপি খুন্দা মাৰে
মোৰ ইমানবোৰ জিভা নাই
সংশয়ক সংশয়ৰ সম্ভাৱনাৰপৰা নিলগাই দেখুৱাব পাৰে ।
কৌশিক বাস্যস
ফোনঃ ৯৪৩৫২৪৬৫১১
